कांग्रेस कैलालीको सभापतिमा भट्ट विजयी

धनगढी -नेपाली का‌ंग्रेसको कैलाली जिल्ला सभापतिमा नारायणदत्त भट्ट विजयी भएका छन्। पहिलो चरणमा सबैभन्दा बढी मत ल्याएका प्रकाशबहादुर बमलाई २ सय ६३ मतले पराजित गर्दै भट्ट जिल्ला सभापतिमा विजयी भएका हुन्।

भट्ट १ हजार ३ सय ५९ मत ल्याउँदै विजयी भएका हुन्। बमले १ हजार ९६ मत पाए। पहिलो चरणमा कसैले पनि ५० प्रतिशतभन्दा बढी मत ल्याउन नसकेपछि आज दोस्रो चरणको मतदान भएको हो। आजको मतदानमा २ हजार ४ सय ६७ मत खसेको थियो।

पहिलो चरणको मतगणनामा सभापतिका उम्मेदवार प्रकाशबहादुर बमले सबैभन्दा बढी मत पाएका थिए। बमले १ हजार १ सय ६९ मत पाएका थिए भने सभापतिका अर्का उम्मेदवार नारायणदत्त भट्टले १ हजार ७२ र रामबहादुर कलेलले १ सय ९७ मत पाएका थिए।

पहिलो चरणमा पहिलो भएका बम र दोस्रो भएका भट्टबीच सभापतिका लागि फेरि मतदान भएको थियो। दोस्रो चरणमा इतर पक्षले पनि बमलाई सघाउने निर्णय गरेको थियो। भट्ट संस्थापन पक्षको आधिकारिक उम्मेदवार भएर चुनाव लडेका थिए।